يتكلمون كثيراً عن عدن وإعمار عدن، وطبعاً هادا شيء طبيعي في مرحلة التعافي زي ما يقولوا.. لكن هل نحنا فعلا في مرحلة تعافي وهل هو دا الوقت المناسب للأعمار والتعشيب ووضع أحجار الأساس وقص الأشرطة.. طيب نحنا عاد معانا جرحى وشهداء ونقص خدمات وبنية عسكرية وامنية غير مكتملة.. يعني مش معقول يا جماعه إن نحنا نترك ملفات هامه زي دي ونتجه للبناء والاعمار وغيره من المشاريع الذي ما أنكر أهميتها لكن أنكر انه نبدأ به الآن ومع هذا مش مشكله.. عادي.. اعمروا وعشبوا وخدوا راحتكم على الاخر، لكن اهتموا بالخدمات الأساسية، عالجوا مسالة ارتفاع الأسعار اللى قسمت ظهر المواطن، انتبهوا للتعليم، طورا الجانب الصحي، شوفوا صندوق التحسين، طوفوا على مكاتب البلدية.. في مائة ملف وملف يستحق الاهتمام.. كلنا نتمنى ترجع عدن عروس البحر الأحمر لكن مش بالشكل واللون، لا بالخدمات الراقية الذي بتجدب زوار عدن الأولين..

نشتي عدن نظيفة، متكاتفه، ذات بنيه اقتصادية واجتماعية وسياسية متوازنة ومتمرة خلاص يكفي بعوله وشرشحه على مستوى عالمي، الناس برع يضربوا بنا المثل في الفقر والتمزق والقتل والبيع الذمم خلو نحنا نفكر بمشروع حضاري متكامل يكون الإنسان فيه هو المحور والأساس.

اسمحوا لأفكاركم تتعانق مع طموحات الجميع، لان القرار الحضاري قرار شعبي، الحكومة ما تقدر تسقينا الحضارة عبر جرعه دوائية زي حق شلل الأطفال، وبعدين في كثير خطوات مفقودة في وصفه إعمار عدن وأخاف لهذا السبب ما تطلع الطبخة حلوه!